Seydayê Tîrêj

Kawa serê xwe rake meyzeke tu `l vê dozê Lawê te xwîn rijandin ji bo cejna Newrozê Tu xweş zanî gelê Kurd hemû gernas û merdin Ji xwînê re çiqasî çav fireh û comerdin Silêman ey kurê genc serbilindê navê xwe Tu bû malxuwêyê malê ji bo kalê bavê xwe Lê te qîma xwe nanî bi tembelya civatê Te zend û bend vemaltin ji bo kar û xebatê Bi pêlava lastîkî bi çakêtkî ji balê Bi bentelonkî xilmet tu bû karkerê malê Tu ket warê xebatê şêr û gernasê welat Cilka jar û xizanyê te zû ji ser xwe avêt Lê namûsa pir mezin ku hate roja welat Ruh û canê xwey şêrîn te da mizgîn û xelat Tu îro dewlemendî bi şerefa navê xwe Te îro pir hildaye serê kalê bavê xwe şerefeke pir giran te daye xuşk û bira Te li gundê Lodika vêxistî mûm û çira Tu îro bû şehîdê bîst û yekê Adarê Navê te hate kolan li ser enya buharê Tu jî îro gihiştî wan şehêdên li Zêwa Tu bû ji wê civatê tu ket sef û rêza wa Silêmanê qehreman bi jîna xwey ciwanî îro berî her kesî xerc û bêşa xwe danî Silêmanê dilawer me`d nav xwîna te de dî ayineya Berzanî resmê Se`îd û Qadî Ew xwîna pak û paqij ku li qadê bela bû çiya û deşt û zozan hemû têde xuya bû Bi sûnd û soz û peyman tucar em xwe nadin paş Ji ser rê û şopa te can dê bidin bi şabaş Bilîlîn ey keça Kurd bes bigrî tu`b delalî Li ser xortê nûhatî ciwanê çarde salî Baqên gula bibarîn li ser gora Silêman Xortê çeleng û hêja canfidayê Kurdistan Gelo şens û bextê me ta kengî wê li xwar bî Ev feleka malxerab digel me tim neyar bî çiqa pesnê te bêjim xelas nakim tucarî Hezar rehmet ji nik min li gora te bibarî Sala hezar û nehsed digel Heştê û şeşan Bîst û yekê Adarê şehîd çûye Silêman Tîrêj bi fexr û nazî dike şîna te herdem Kurê mihemedê Emîn, heval û yar û hemdem.