Seydayê Tîrêj
îro ji eşqa dîlberan
Êdî bi yek carî me bes
Gulyên di reş wek ejderan
Ew rewş û dîdarî me bes
Ew zilf û bisk û temberî
Eprî hevirmêşê berî
Ew kofî kêla serserî
Zincîr û ew çarî me bes
Enya sipî boz gewher e
Wek neynika îskender e
Kelha li Dara raser e
îdî ji wî marî me bes
Birwên di reş rengê kevan
Awir ji tîrên şerefxan
Dêmên di sor wek erxewan
Ev qehr û azarî me bes
Rû roj li dinyê xweş hilat
Dev kaniya Dicle û Firat
Ziman ji êmîşê welat
Êdî ji wî zarî me bes
Sing bexçe û baxêd gulan
Cê mirx û teyr û bilbilan
Havîngeha wan dil kulan
Êdî ji wî warî me bes
Bejna bilind Birca Belek
Textê Bedirxan lê serek
Mîna min kuştin wê gelek
Êdî ji ferwarî me bes
şehzade û mal mezinî
Bi rist û guhar û gerdenî
Ew sebebê jana min î
Êdî evîndarî me bes
şîret ji bo ehlê dila
Xwe nekne tora çav kila
Nekevin ber êş û kula
Fîxan û ev zarî me bes
Ev gotina pêşyên berê
" Awrek ji çavê dîlberê
Kûrtir ji derba xencerê "
Ev eşq û dildarî me bes
Sipas ji yezdanê mezin
Tore û helbest dane min
Tîrêj im ger pirskî ji min
Ji wê reha Arî me bes
Anlam için kelimeye çift tıklayın (Ferheng) Anlam için kelimeye uzun basın (Ferheng)