Seydayê Tîrêj
Ji can û dil li te pîroz be ey şehrê Nisêbîn
Digel baqek gulê kesk û zer û sor, ala rengîn
Hela rabe xwe wek bûkan bixemilînî ji nîro
Bela xort û zerî bên reqs û govenda te îro
Ji Kermêt û Cipiltînê ji şe`banê ji Sîtê
Ji Dêrcem û Metîna ji Bêrtê û Meçîtê
Te bughêzin ji kur amê re bûka ser bi xêlî
Bi darê kotek û zorê eger dijmin nehêlî
Ve xortên te gihiştin tev bi hêrs û dilşewat in
Di cengê de li meydanê fidakarê welatin
Wekî Zinar û Salih her wekî Reşo û Zana
Ruhê şêrîn kirin gorî, ewan xort û ciwana
Ji bona serxwebûnê ew ketin rêza şehîda
Di gel karwanê Mezlûm û Kemal û wan egîda
Nisêbîna bi nav û deng cihê box û berana
Li kurdistan tu bû dayka cil û sê pakrawana
Ewa navê teyî sêrîn qelemkêşê negarê
Bi tîpên zêr nivîsandî li ser enya buharê
Di tarîxa welata de gelek koka te kûre
Ji dewra Mîd û Mîtanî de hê bêtir tu dûre
Me wext nîne ku dîroka te bêjim ez di virde
Ji ber ku pir dirêje bengehek asasê kurde
Di çala û di zindanan de girtî bê jimar in
çi ku zindan du qatin hin li jorin hin li xwarin
Heval Hogir tu rabe j`rex Hebîsê tornê malê
Tu çend xortan bidî hevdû ji Zorava ji çalê
Ji Talat û Tinatê hem ji topraxa Letanê
Ji Herbê û ji Golê û ji Qesra Serçexanê
Bi berbangê re bigrin ser Nisêbîn wek pilinga
Derê hebsan bikin perçe bi qûndaxên tifinga
Ewa girtyan bi derxin ta digel we ew bibin yek
Ku êrîşek giran hûn bidne ser qişla Silo beg
Wekî Tîrêj dibê êdî bese ma heq rewaye
Ji me pêve di bin destê neyaran kes nemaye.
Anlam için kelimeye çift tıklayın (Ferheng) Anlam için kelimeye uzun basın (Ferheng)