Seydayê Tîrêj
Ey felek bê bext û bê dîn
çi ye te li me kîn û rik
Dil bûye golek tijî xwîn
Tê dijîn geşt û kelik
Leşkerê derd û xeman
Salarê wan geşta ne ew
şûr û rim herdem bi dest in
Ta bi serbaz û belik
şans û bextê me reş e
îro ji ber alî felek
Cogê me herdem xerab tên
Yê neyar tim mîr û çik
şans û bextê xwe me nasî
Ku bi setrenc û bi dam
Yê neyar tim fîl û ferzîn
Yê me şahmat û berik
Milletê dinya hemî
Bûne xwedî tac û sera
Milletê kurd bes tenê
Ma bê şahînşah û serik
Ma çi gunehê me ye
Ey çerxa felek bê ol û dîn
Sed hezar carî tifû li te
Pîsa bidkar û dêlik
Me divê rê de bi derdan
Pir fîdakar û şehîd
Pir egît û mêr û gernas
Bê jimar û lek bi lek
Kanî îhsan Nûrî Paşa
Kanî kalê şêx Seîd
Ka Bedirxanê xwedî
Tac û şahê birca belek
Kanî şêx Mehmûdê Berzencî
û ka Yusif Zîye
Kanî ew Qadî Mihemed
Bavê kur Elyê kinik
Ka Fûad beg, kanî Xalid,
Ka Extî kanî Heqî
Kanî Seydo, kanî Yado
Ka Birahîmê kinik
Ka îsa bavê Siwaro
Kanî ew şêr û piling
Kanî Leyla Qasim
Xuşka delal û çav belek
Kê wekî me xwîn rijandin
Wî di vê dewra Cîhan
Ne ji tirk û ne ji ereb
Hem ne moxol û ne tacik
Tim bila li enya te bî
Ev şrm û ev ara giran
Her wekî Tîrêj dibêje
Dijminê bê pişt û zik.
Anlam için kelimeye çift tıklayın (Ferheng) Anlam için kelimeye uzun basın (Ferheng)