Seydayê Tîrêj
Cana me dî l`nêk pencerê
Gurzek gul û çîçek bi dest
Min dest dirêj kir hemberê
Bes min gula sor jê bixwest
Ebrû li min wê hilçenî
Awir vedan got:Ezbenî
Ev sorgula baxê min î
Nadim kesî, ey gulperest
Ger te divê ya kesk û şîn
Ya zer û ya jî Yasemîn
Fermo ji xwe`r wana derîn
Da bîn bikî ey jar û mest
Ger te divê rengê kerez
Ya pembe ya xakî gewez
Nakrim ewa ji destê te ez
Bikre li ber sîngê bi best
Ger te divê ya nêrgizî
Qedîf û xemrî qurmizî
Hilî tu bê ax û xwezî
Reşmar bi nêva dil vegest
Ger te divê ya sosinî
Ya gul hinar û ya binî
Yê`j ter nebî malê min î
Êdî bes e ey dil şikest
Ger te divê tûmek nefel
Ya hin ji rêhana du pel
Yan jî kulîlka qurnefel
Bistîn li ber min bes vewest
Ger te divê ya şîrikî
Ji ter di pêsîra xwe kî
Tîrêj tu xweş bawer bikî
Ya sor bi destê te neket.
Anlam için kelimeye çift tıklayın (Ferheng) Anlam için kelimeye uzun basın (Ferheng)