Melayê Cizîrî
Serê zulfa te bi kullabê du`a
Hate destê mi bi cellabê du`a
Sofîyê xelwenişîn bêne sucûd
Herdu birhên te ne mihrabê du`a
`Erdê kê dê bikirim sûretê hal
Ko tu yî qibleya erbabê du`a
Ji du`ayê qedehek derdest e
Her seher mestê meya nabê du`a
Gulê iqbalê ji gulzarê qebûl
Mi çinî bû di şekerxwabê du`a
Ber du birhên te ji ixlaş û yeqîn
Mi dibir secde bi adabê du`a
Ji dilek şafî tu mihrabê bibîn
Secdeyek lazim e der babê du`a
Mi di dil `urwet-i wusqa ye bi dest
Ji senaya te ser elqabê du`a
Ji ezel yek cihetî daye Melê
Her me ixlaş e ji esbabê du`a
Anlam için kelimeye çift tıklayın (Ferheng) Anlam için kelimeye uzun basın (Ferheng)