Melayê Cizîrî
Bê lebê le`lî Mela min ji meya ali çi hez
Suhbeta tê nebitin yari bi her hali çi hez
Qedehek bade bi destê xwe li qelbê me birêj
`Aşiqê soxîte bê ateşê seyyali çi hez
Ne ku wek teyr ji mujên te bibarin peykan
Ji birînên di dilî şubhetê xirbali çi hez
Hezz û lezzet me bi `umrê xwe di `işqa te nedî
Hem bi van derd û xeman zêde tu îsali çi hez
Husn û sur zatî nebit cezbe li dil dit mehbûb
Me ji zulf û xet û xal û qedê meyyali çi hez
`Ilmê `işqê but û latan bi rîwayet nabitin
Qederek hal ku nebit şubhetê her qali çi hez
Bedewî paki çi kit feshetê meydan ko nebit
Mustmi` guh nedirit mutrib û qewwali çi kit
Durrê nasufte dibêjim ji lebê le`lî Mela
Ger rewanbexşi nebit nezmê ker û lali çi kit
*Li gor çapa Nûbiharê hate serastkirin. Dîwan Melayê Cizîrî, Çapa Sêyem, 2010, Nûbihar.
Anlam için kelimeye çift tıklayın (Ferheng) Anlam için kelimeye uzun basın (Ferheng)