Rênas Jiyan
koleksiyona 15`em, li xwînxanê, eynter
ev çirûsk, ji biriqandinên qirîstalên qeşê hatiye
berhevkirin
di tahma biraştina goştê însanên mirî
û di bêhna berateyên peykerên qefilî de ye
qesrek ji qeşê
heykelên devê deriyên wê diricifin
ji sermê
tiliyên min diweşin
rengê xwînê sebx vedaye li mermerên binê wê
ji jêrzemîna wê qîrîna mebredkirina kêran tê
hudûdê şevê dabeliandiye sînorê sehera sibê
û qerepera bê
ji çaraliyên mezrîbên qesrê diherike xwîna keçkaniyê
serê karxezaleke serjêkirî ji bo gewdê xwe digirî
di kûpên mezin de jahra meyandî
li salona wê
hûtekî heftserî û pîrebokeke portîremahrî
bi hev şa dibin bi jakawî, şilfîtazî
refeke pelçimokên lûsiyayî bi firê dikivin
ji nalînên zewkê yên pîrebokê
di tariyê de teperepa lingên tiştekî bixof tê
li jorzemînê
hîrehîra kenên cinan
niha ji zû de divê xwaribin wawîkan meytên geniman
pîrasêr bi şûjinê di birîna canê bedewiyê de bîrê dikole
li împarotoriya bahozê
nav û kincên sor li xwe neke
heke te sar be kefenê min li xwe bike...
Ji pirtûka Mexzena Xwînê
Anlam için kelimeye çift tıklayın (Ferheng) Anlam için kelimeye uzun basın (Ferheng)