Cegerxwîn
Bibe partîzanek bi rist û dirist
Digel partîzanan here dest bi dest
Ji milet re rê xweş vekin renge şêr
Eger xurtemêrî bibe wek sitêr
Tu ronî bide karker û gundîya
Tu xweşke dile bav û xuşk û diya
Tivingê tu bigre girêde tu rext
Herin ser çîya, “yan ji text, yan ji bext”
Bibe partî û hem bibe partizan
Eger serbilindî dixwazî, bizan
Nikarî bibî serbilind, navgiran
Heta kod i şer da nebî wek beran
Li ser van çîyan ko nekî qîr û ceng
Bi êrîş û hawar û halan û deng
Tu nabî serefraz û azad û kurd
Li çolan tu dimrî wekî yezdîgurd
Bi dijmin re çendan bibî dost û yar
Dibî rencber û koleyê koledar
Çiqas şerm û pîs e wilo dil bi tirs
Dibî koleyê turk û tazî u firs
Kurê Keyqubad û kurê erdeşêr
Çi şerm e wilo ko te ser daye jêr
Here ser çîya lê bi top û tiving
Şerê dijminê kurd bike wek piling
Te dijmin deranî dibî xweş mezin
Bi lîl têne pêş te kemerzêr û jîn
Li Eywanê Kesra dibî şehreyar
Xwedî rist û destûr û ferman û dar
Dibî payedar û xwedî mêr û pişt
Welatê xwe yekser dikî wek bihişt
Dibî wek çira geş di nêv rojhilat
Bi te geş dibin tev çîya û kelat
Divê bîr û bawer bibî wekhevî
Xwedî par û pişk bin bi mal û zevî
Eger wek dibêjim bikî, yan bibî
Dere zêrzemînê l imin dê vebî
Bi paye bibin em hemî serbilind
Li we dê binerin hemî şox û rind
Di xan û seran de bijîn dilxweşî
Ji nav me biqeştî, herî çavreşî
Anlam için kelimeye çift tıklayın (Ferheng) Anlam için kelimeye uzun basın (Ferheng)