Bahadîn Robar
Îro xweza û hawir li min sar e
Dibînim çav û awir li min sar e
Pêt û guriya agir li min sar e
Sing û serî û paxir li min sar e
Îro li vê cîhanê pêşî û axir li min sar e
Îro Cizîr û Kerbela û Gulîstan sar e
Meke û Quds û Kurdistan sar e
Tav sar e, av û ax sar e
Bihuşt sar e, evîn û havîn sar e
Yarê, îro li min nefs û nefes sar e
Laş û beden û xwîn sar e
Giyan û mirin û jîn sar e
Eşq û evîn û Zîn sar e
Çendî hebin kitêb û dîn sar e
Îro dil û dilyar û Bahadîn sar e
Rojhilat û Rojava sar e
Hembêza dayîk bava sar e
Ronahiya herdu çava sar e
Diqerisim lewre tîrêjên tava sar e
Sond dixwim dibêm îro dojeh sar e.
*Ji pirtûka wî Birca Belek, r: 103, Weşanên Ar.
*Bi destûra helbestvanî ye.
Anlam için kelimeye çift tıklayın (Ferheng) Anlam için kelimeye uzun basın (Ferheng)