Selahedînê Gimgimî
Tim dinalim û dikalim zarezar wek bulbulan
Ferqa min wê ew li ser gul ez ji ber derd û kulan
Ew di baxê wesletê da, ez di narê firqetê
Mame her tim ez disojim, diqelim tême kelan
Ger çi ew jar û ze‘îf e lê li ser halekî tim
Ji şewat û pêtiyê ez roj bi roj tême helan
Ew dikare derdê xwe bêje dilî derman bike
Ez nikarim bêjim her wek perperoka bêziman
Dilbera! Ger tu dixwazî ku bibînî derdê min
Dê ji te ra welgerînim yeka yek qatê xeman
Dergehê dil ger vekim dê tê bibînî tijî ye
Ji çeşîdê sitrî û vîtê û new‘ê keleman
J'alekî ez bulbul im j'alê dinê perwane me
Geh dinalim geh disojim bê his û zar û ziman
Tim dizarim tim dinalim dikelim wek germeav
Kes tune carek bike rehmê li min hey el-eman
Qelbê min wek agirê Nemrûd ji xo ra hil dibe
Tû yî Îbrahîm di nava bax û bustan bêguman
Gemiya ‘eqlî hilanî bayê ah û pêlê xem
Ez ditirsim li zinarê ‘edemê xe her zeman
*Wezn: Fa'ilatun / Fa'ilatun / Fa‘ilatun / Fa'ilun
*Ji dîwana wî Derdê Welat, rr: 128-129, 2018, Nûbihar
Anlam için kelimeye çift tıklayın (Ferheng) Anlam için kelimeye uzun basın (Ferheng)