Pîremêrd

Caran de roj be heçeheçe û bareberîyewe Germa û sebûn û lêzime û baran û terrîyewe Roj baperrî û wirrêney şew raperrî û tekan Bawêşkî lerz û ballefirrê û çoqeçoqî dan Tirsî terîde pêşkeşî siwar, şew firrînî diz Destiyawî barî kewtû le cêgay xilîsk û xiz Erkî gizîr û xanebigîr, moryanî niwên Bolley keybanû, kifrî qetarçî, pilarî ciwên çengsûtekey be aw, ke rûy nordiwe nanî kon Cûte û leqey tewîle û hallawî ters û bon Agirî tepalle, loksî gizgil, gefînî seg Deste û yexey qetarçî le ser kaw, şerre kutek Nûke şeqî qetarçî bo hellsan û peley Loqe û tirîskey îstir û bazdanî cogeley Lasengîy barwere bere parsengî xwarîyekey Xo kewtî pêt le xirrke çû, lew deşte çî dekey? Hêcgar ke afretit le teka bû, be tirsewe Her siwarêk derkewê dellêy: Ay cerde ye ewe Bac û pîtakî Zengene, gîrûgiriftî Caf Herçîş ke hate pêş Hemewend birdî saf le saf Bem kiwêrewerîye û kulemergîye û beçillkewe Sêbende wergerraw, be ser û rîşî kullkewe Emca deçûyte şarewe nawmallî ‘asîme Bêt û binûsrêt nabête xwêy çêşt, eme kem e Êsta siwarî otumbîl be, be sê se’at Detbate ser qîtar û le Bexda yî ke roj hellat Siwar be, binû, beyanî le xew heste zû be zû! Bexda ye hat be pîrtewe, deybînî rû be rû Caran eyanwit: Ewe welî ye teyyî erz eka Pêçanewey zewî nîye, fenn e, karî berz eka înca ke hat birûske xiraye telêkewe Hênraye xanuwewe le çiray her pelêkewe Zortir le mangeşew der û jûr rûn kirayewe Tarîkî la çû, têgeyînî ême mayewe Carê ebê bizanîn emane le kiwêwe hat Em xake çon le xwarewe wa rojî lê hellat? îtir ebê berraberîy zanistî têbigen çîtir le mane çaktir e bo berzêtî weten Le lay min xwêndewarî ye, ah xwêndewarî ye Her mîlletêk ke fennî nebê derdî karî ye Ax xozge xwêndinîş weku min arezûyî dekem Bibînim û nebête girêy qursî kifnekem