Pîremêrd
Em şew bom rêkewt, çûme xizmet yar
Ne rêy pasewan, ne bed, ne exyar
Tenha se’atê, tenha min û yar
şew xerqey nîlîy qetranî poşa
Kelleşêr bêdeng, bangî nexiroşa
Murxî ’erş le cêy xoy hellnîştibû
Diyar bû mandûyetî rojî çêşt bû
Kakêşan barî kerî kewtibû
Reşkekayî le ser rê hellriştibû
Gay hewtewane kay zor xwardibû
Hewsarî bedest qutib spardbû
Ew şewe Leyla û Mecnûn lêk kewtin
Hêcgar le ’eşqa nedesirewtin
Awatexwazî xellik hatibuwe dî
Le rûy eflaka cûllet needî
Hellsam xom gurc kird, aza, şêrane
Nemdegut hîç kes le lam însan e!
Xerqey şewgerdîm kêşa be ser da
çakî dawênim kird be kemer da
Royîm ta geyime astaney leyl
şêtane wêney qeysekey Duceyl
Geyime jûr serî le nîweşew da
Êşikçî kenîz hemû le xew da
Be edeb pêm na çûme serînî
Maçim kird xallî lêwî şîrînî
çawî hellbirrî sewllî xeraman
Yexey dadirrî ser ta be daman
Witî: Kam bêşerim le nîweşew da
Wa hellîsandim le şîrînxew da?
Berqî ruxsarim bida le cesteyî
Hellîqirçênê endamî xesteyî
Witim: Ey şem’î rûy nazenînî
Perwaneket hat ta bîsûtênî
Min be hîway ser nehatme êre
Qurbanîyekey tom bimikuje, xêr e
şorî ’eşqî to bê tirsî kirdûm
Herçend e zîndû m, le rîzey mirdû m
çawit bîmarî be naw le ser e
Piyawkuştin le lay bîmar xeter e
Anlam için kelimeye çift tıklayın (Ferheng) Anlam için kelimeye uzun basın (Ferheng)