Walî Bedelpûr
Ey tu qatilê rihê min, ka bibêje kê tu anî
Kê tu kire agir û pêt, di nawa dilê min danî
Kê bi destê te min istand, sebr û arama derûnî
Agirê dojehê yêk car, kê bû ku berda wî canî
Ka bibêje kê bû ku tu, kire padîşahê gerdûn
Bi çokan ketin li ber te, xusrew û qeyser û manî
Çi bûye sebeb kû îro, hemû kes ji bo te dêjin
Kê tu bir di nawa şe`irên, mele û feqî û xanî
Tu çi bû evîn ku te eql, ji zuleyxayê bir û wê
Ferqa nabeyna xulam û, ezîzê misrê nezanî
Mecnûn û mem û sîyamend, ferx û ferhad û kerem
Ka bibêje kê bilî te, ev birin rêka nemanî
Kuşt û kuştar û kîn û xwîn, karê te gel aşiqan e
Ka bibêje bo wê zulmê, kê tu kir ba`îs û banî
Walî pir li te dipirsî, lê tenê gehişt cewabek
MELEK_OL_MEWT î evîn tu, tu yî EZRAÎLê sanî
Anlam için kelimeye çift tıklayın (Ferheng) Anlam için kelimeye uzun basın (Ferheng)