Mîkaêlê Reşîd
Dilêm wire, li wan ç’ya,
Li wan cya,
Kîderê ku zeng û zinar
Bona kurda bûne sitar,
Kîderê çem dikewgirîn,
Wexta dişon hezar birîn,
Birînê wan lawê efat,
Ku hiştine mal û xebat,
Rabûne şer’ bi sîng-beden,
Wekî nebin feqîr, reben,
T’ucar nebin qûlê neyar
Û nemînin bê mal û war.
Dilêm wire, li wan ç’ya,
Li wan cya,
Kîderê, ku teyrê kubar
Hêlan xwera kirine war
Û kurdara bûne heval,
Ber çeva tim ç’ya û newal,
Kîderê ku kulîlkê al
Bîrnakin wan mêrê helal,
Ku boy weten şêr’da can dan,
Û xûna wan
Boy kulîlkê li wan deran
Bûye rengê şîna giran.
Ez dixwezim li wan ç’ya,
Li wan cya
Rokê rabim û bigerim,
Kîderê ku xûn bû, mirin,
Û ramûsim mezelê wan,
Ê ku candan,
Wekî timê bijî weten,
Navê me kurd û Kurdistan.
1964
ji We'de-Pencere-Mitale, Weşanxaneya Belkî
Anlam için kelimeye çift tıklayın (Ferheng) Anlam için kelimeye uzun basın (Ferheng)