Dilbikulê Cizîrî

Dosta min dilbera min Zimanê dayika min Ya bûyî qedera min Zimanê dayika min Zimanê min ê pêşî Bikartînim bê êşî Pirr heye wê rakêşî Zimanê dayika min Mehbûba Şêxê Xanî Wî her ew bikar tanî Jê hez dikir wek canî Zimanê dayika min Dilbera wî Tîrêj î Cegerxwîn her dibêjî Ji bil wan hê jî hê jî Zimanê dayika min Kamûranê Bedirxan Wî xwe bo wê kir terxan Xweş e wek goştê berxan Zimanê dayika min Ya seydayê min gotî Wekî Melayê Botî Dil û cergê min sotî Zimanê dayika min Gelek hêja û qedr e Şîfaya qelb û sedr e Bê wê nîne min hedr e Zimanê dayika min Pir paqij û temîz e Ber dilê min ezîz e Bi wê bixwîn wecîze Zimanê dayika min Zimanê Hind-Ewropî Adet û kevneşopî Bo min bûye dest û pî Zimanê dayika min Çar lehçe ne yan jî pênc Bo hifza wê bûne sênc Xeber didin pîr û gênc Zimanê dayika min Hem Kurmanc û hem jî Lor Hem Goran û hem Kelhur Biparêze Rebê Jor Zimanê dayika min Wê sih û yek tîp hene Bi dostan ra dikene Çi’b kim îro reben e Zimanê dayika min Dawet û dîlanên me Îlac û dermanên me, Qedexe fermanên me Zimanê dayika min Dua û lavayên me Bûkên me zavayên me Hemû malavayên me Zimanê dayika min Mamik û lawikên me Digotin dayikên me Êşên me tayikên me Zimanê dayika min Ta mirin wê bernadim Ne mumkin ber jê badim Wê bi dinyayê nadim Zimanê dayika min Hem koçer hem dêmanî Wê kartînin ji canî Hewcê wê ne wek nanî Zimanê dayika min Gotin û biwêjê wê Sazbend û dengbêjên wê Diçin jor tîrêjên wê Zimanê dayika min Mesel û çîroka wê Pir dûr e dîroka wê Bibîn naveroka wê Zimanê dayika min Bil wê nîne yara min Yê tête hawara min Ya her bûyî para min Zimanê dayika min Ew e mehbûba dil de Kincê Kurdî li mil de Yek bêje navî hilde Zimanê dayika min Ger ew nebit ez nînim Dîn dibim wê nebinim Bi tamek xweş dixwînim Zimanê dayika min Bo min ew zulfa yar e Binêr pirr herikbar e Bixwînim wê sed care Zimanê dayika min Wer em lêbibin xwedî Bê tirs û xof û fedî Ber neyar ve bernedî Zimanê dayika min Ya gelek jê hez dikim Ber bi wê ve bez dikim Bo hînbûnê lez dikim Zimanê dayika min Xêrnexwazên wê pirr in Kar û îşê wan virr in Xêrxwazên wê wek dirr in Zimanê dayika min Roja min û şeva min Hawara min reva min Her demê rojeva min Zimanê dayika min Ya wek lêmişt û laser Min her cih kirî raser Ya ez kirîm sewdaser Zimanê dayika min Di xwarin û avê de Di seydê de ravê de Li ber sih û tavê de Zimanê dayika min Dawa min û doza min Peymana min, soza min Qudsî û pîroza min Zimanê dayika min Havîn û zivistanê Li mal û dibistanê Li bexçe û bîstanê Zimanê dayika min Xewna min, xiyala min Ya her dem li bala min Newroz û sersala min Zimanê dayika min Ya dîn kirîm wek Qeysî Li çolê wek Uweysî Ez kirîm gêj û sewsî Zimanê dayika min Min ji daykê bihîste Bi bîst û bîst û bîste Min kirî xoşewîst e Zimanê dayika min Şirîna min Zîna min Heyata min jîna min Ya bûyî evîna min Zimanê dayika min Li piya û rûniştî Xweşiktir ji her tiştî Ya bo min bûyî piştî Zimanê dayika min Sibeh, nîvro, êvarî Bi bîr tînim sed carî Ya Reb kirî diyarî Zimanê dayika min Ya dê bo min dilorand Umrek digel wê borand Bi wê zengîn kirî çand Zimanê dayika min Ji eqsê Dîdema pîs Jina pinti û xesîs Ezê wê her bikim hîs Zimanê dayika min Ya Dilbikul hebandî Cerg û dil lê helandî Di sere xwe de çandî Zimanê dayika min *25.08.2021 **Bi destûra helbestvanî ye.