Zulkuf Kişanak
Zelê,
Dewa serê koyan, Zagrosan
Milê Awka Bokanî
Halînê gerîlayan
û tîja mi
Cor de
Tewr cor de nizdî asmênî de vinderte Binevşe
A, hema hewtêsserriye bî
û Nisêbîn ra amêbî
Tew
Sêwregi ra Serhed Sîncar, Ekremê ma
Dirbêsî ra Doktor Zorava
Gerger ra Avreşo delal
çewlîg ra Rojhat
Xarpêt ra Agir
Amed ra Roşan
înan ra yew zî Cudan bi
Cudanî xo ra vatêne “Cafer”, Sirûc ra amebi
û pêroyê Kurdistanî ra kênay, xortî
Mil bi mil ameybî na dewa serê koyan, Zagrosan
A roje
A kîşte de Bokan, na kîşte de Zelê
û a kîşte de farisî, na kîşte de erebî
Cor a zî tirkî amey
Bi pancas û di teyare ya, hawar
Adir vara, sûr-sûr bi heme ca
û asmên veşa nê adirê sûrî ra
Koyê Qendîlî ra nat a
Roje vîst û heştê kanuna neway û çarî bî
Delalê
û delala çimrengîne, eşqa girde
Tîja mi
Bi vengê tifingan û doçkayan
Binevşa ma neqirnay koyî, qewirnay teyarey
û pêro bêtaranê asmênî
Wexto ke qazanî amey war
û qîjî kewte estoranê bazirganan ser
Mezelan ra cêr, rayîrî ra cor
Qazanê diyine, hîrêyine pêser o
Verê xo da nêweşxaneyî, nêweşxaneyê Doktor
Zoravayî
û sekûya dirbetinan, a ke kîşte û kinarê Awa Bokanî de
Hawar
A roje
A roja ke tîje ko xemilnabi
Koqendîl bibi sey veyvekan
û bibi çîlsipî
Hewt ganfîdayî, hewt qelenderî kewtî asmên ra
Sey astereyan
Delalê
û delala çimrengîne, eşqa girde
Tîja mi
Anlam için kelimeye çift tıklayın (Ferheng) Anlam için kelimeye uzun basın (Ferheng)