Roşan Lezgîn
Hamebi wesar hêgayê m` beyar,
Tov kerdî heme bi cite w` cobar, hoy birar!
Çinê bi rêber teng bî ca û ber,
Her çî bi bedel mi pêro ezber, oy keder!
Hamebi hamnan meyweyî resay,
Zerîyî huyay zerencî peray, wîy risway!
Mi nêzana qedr nêzana qîmet,
Mi bi camêrdî heba kerd qismet, ney minet!
Hame payîz rew pelê mi bîy zerd,
Kincê mi tenikî hewa bî serd, wey derd!
Ne esto sitar ne yew ca û war,
Ne dost û heval ne waştî û yar, hey hawar!
Hame zimistan dewran vurîya,
Viran mend pistan perîn dirîya, wax dinya!
Rojê mi şi awan şewê mi derg,
Zerrîya mi wêran cemed kewt cerg, ax merg!
__________
Çavkanî: Newepel, Rojnameya Kulturî, Hejmar 81, Diyarbekir, Teşrîna paşîn 2015, r. 1
Anlam için kelimeye çift tıklayın (Ferheng) Anlam için kelimeye uzun basın (Ferheng)