Nezîr Palo
Li xwîna xwe dereng dimînim
ew xwîna ko
di bihna pelîsank¹ û sicê² de
hêrsa xwe vedikuje
û jana rengê xwe
ji darivtina rengên bê tebat dihûne
û çîrokî sermestiya xwe têde vedişêre
ew xwîna ko
bi kenê serjêkirî difire
û xemkêşiyê di berbanga êşê de
diguvişe
û bi ser termê bêdengiyê de
peymanên bejî dirêse
li xwîna xwe dereng dimînim
ew xwîna ko
di talanê de ji bîrve diçe
û di temenê min de
kayika şînê velûdike
ew xwîna ko
bîranîna titûn di brîna rengê xwe de
şiyar dike
pencera xewnan
di şêlûpêla pirsê de vedike
û di hêlîna bendemaniyê de
hulma kufikê vedimrîne
ji bejna Royê
sosine tevizî diçine
û di salên herftî de
bi hêvanê meşextiyê
nalînê dimeyine
Li xwîna xwe dereng dimînim
ew xwîna ko
bihnxweşiya evîne
di neynika xwe de vêdixîne
û xilmaşbûna demê
bi çirûskên giyanê
dişkîne
ew xwîna ko
sînorên qîrînê derbas dike
û di asoyên gêjbûnê de
ziwabûna sibeyên cejnan
disotîne
Li xwîna xwe dereng dimînim
ew xwîna ko
li şûna xwe
dengvedana stranên sirgûniya xwe
dihêle
û di bîrîkirina berfê de
sirûdên koçbariyê dilorîne
û di sazên baranê de
tîbûna xwe dixwîne
ew xwîna ko di navnîşanên beravêtî de diherike
û di kezeba axê de
keseran diçîne
û di pença min de
bi helbestan de vedide
¹: Pelîsank: Bi erebî: Beylesan
²: Sic: Zeyzafon
Anlam için kelimeye çift tıklayın (Ferheng) Anlam için kelimeye uzun basın (Ferheng)