Arîşenê Memî
Torin û garden bi xal a sur perî
Nazik û şox û şirîn û fenerî
çi qeşengî.. bejn û bala wek livin
Tenik û bala û berz, bê sîberî
Dêm ji heyva çardehê, tav û çirîs
Pê de tê ne jêrê.. biskên şehkirî
Reşkezî kirne belav te ser mila
Pêl bi pêl lê didne bayê bakurî
Lam û çen bozin wekî berfa xelat
Bître nabin belekî lê bigerî
Belezîza qereçoxî dayî der
Bi xunav û şevnema heyva çirî
Lale ya dol û newalên gundikî
Hilmû bîna xwe didê serranserî
Nêrgiza av û delavên deştî tu
Li kenar û kevî û her deverî
Sinbula çîmen û gulzaran tu yî
Tak kenêra şaxbelav û feyzderî
Mêkewa hîman û kohê darikî
Rojê berbang û sipîdê dixurî
Mişt dikî dol û newalan bi ewaz
Belt bi belt xwe diguhêzî bi wirî
Aho ya deşta Riha yî yan jî Wan
Havîkirî ji herêmê û kerî
Yan te windakirye lê cotikê xwe
Silbûyî hatî li vada digerî
Pesn û rewşên te pirin nayin jimar
şahgula baxanî tu xweş dilberî
Ez dixwazim bidme te pat û silav
Biçimênim ji te re bejn û serî
Hêvîdarim wergirî tu van ji min
Rêzepeyvên xunes û bê dilgirî
Xanima pir nirxû hêja û biha
şevçiraxa dilbijan, navemirî
Ger çi bêjim ez di derbarê te de
Hîn bi sed reng û ruwî bengîntirî
Anlam için kelimeye çift tıklayın (Ferheng) Anlam için kelimeye uzun basın (Ferheng)