Sînan Sutpak

çîkê adirdê sînayene, vînayîda to ra pekî Bi şebatedê bengdê to ya Jano bêderman devist zerrîda min a mejûdê xo ra bêhayî ro. çîkê bengdê to, bî şebateyê sînayene Bi sebirdê to ya, zerrîyan ro, Birrê asanî karitî aridey a karitene Mi mezg ro bi Baxçeyê Ednî Bengê to, nameyê jandê vîyarîyan Bengê to, mijdîyanîya sînayene. Bi a devisten a keyberê nimitey mi zerrî ro abîyay. Keyberê ke waredê erjayeyan ro abîyênê Mi dî ke laşê mi heme Dirbetandê nimiteverdayan a dawîyayo. Ma verê nê dirbetan a, mi çi zanayêne ke nameyê sînayeno bîn jan o? O jano ke her ke damaran de xoserbîyayenî rê sere hewa dano vatena haydarî mezg ro peyşneno. O jano ke tewrdê leym û leşdê ravêrdenda peyraverdayê ya hênîyê çiman ro mîyanîkî teqneno û beno leteyê kozdê bêtobîyene. Her ke beno jan û dano zerrî ro xişm namî xo ro keno newe, a game çimeyê hênî de şabîyene dem û war de cemidîyeno. Ma bes nîya jananten? Vîyarîyan ver zerrî masay Ciwîyayene ro tamsaley qewimîyay bes o, de bêrî! Bêrî ke wa vîyarî şahî de binewsê û hissî, wa pirênê wisarî xo ra dê. Ma to nêeşnawit ke bêtobîyene çiçî qewimna? Cîgere keserandê bêbinan de, Zerrî tîkan der a. Qeyamê ke kitabê pîrozî degirewtî, ver warpay Tûfano ke ê Nuhî ey ver de xeylê hurdî yo, Mi ro qewimîyay pira-pira cuya mi, bêrîda to rê bena nanwer. Bi têser de aqelibîyayenda ay bêrîya Zerrîda mi ser o dej, her roj erjanêrî yo. Derman, ameyena to. Bêrî ke wa hamnan bi vewr a serşo bikero. Bêrî ke wa zimistan hamnanî ro têşanî bişikno. Wa wisar pexîlîda pê ya şabîyene ver rewêrî welatdê sînayeyan ro mêman bo. Payîz wa xincikinî ra, a xo gan kewo. Sebebê ke çimanê mi rayda to yo bêmîraz verdanê wa mîrazdê xo nêresê. O wext zerrîya ma, do vengdê deyîrandê waştêkan a, gireyo korî xo sêne ro akerê û dekewê qezencdê şahîyandê neweyênan. O wext waştenê vatenan de mendeyî bi vatena vatenandê pîrozan a do alozî ra bireyê û bibê wayîrê rûmetdê ke mezganê vêşanan keno mird. Bêrî çimê mi, vînayîya mi bêrî! Eştena zerrîda mi de bêrî. Bêrî bivîni ke çimê mi bê wendenda persandê to hutum der ê. Bêrî bivîni ke na zerrî berdêl a Pê ya şabîyenda rojda weşî rê To bikero mêman to rê bibo mazûvan. Elbîstan, Adare-Gulane 2004 Sînan SUTPAK E. T. K. Cezaevi, D: 5, Elbîstan/Maraş