Mela Mehmedê Nêribî

Ez zaza w’, zazakî vono Ellah heme zon ra zono De goştarê, ez se vono Erey û, roc şi awono Ma beytê zazakî vatî Ellah efsehê luẍatî Zaza û kirdê welatî Karker û ehlê xebatî Ma beytay’ xwu ha nusenî Behsê key Şêx ʿElî kenî Hîş û goşê xwu wa se nî Ay kesê ki goştarenî Verî Şêx Mehmûd Efendî Şêx ʿElîyo Neqşebendî Şêx Seʿîdo hunermendî ʿAlim û şêx û efendî Key şêxon key Şêx ʿElî yû Mi secarey’ yini dîyû Şêx ʿEbdullah Dehlewî yû Mewlana Xalid ey dîyû Şêx Meḥmûd û Şêx ʿElî yû Şêx Seʿîdo Pehlewî yû Şêx Selhedîn dima bîyû Mehmed Seʿîd û, peynî yû Inê şêxê ki ma vatî Yew bi yew nome omartî Xelîfey’ yewbnon û zat î Ehlê îrşad û xebatî Cora cêr ma pêrû vatû Xelîfey û îcazat û Yew bi yewnon ra girewtû De bizonê ma se vatû Welatê key Şêx ‘Elî yû Bismil û deşte w’ berrî yû Nesîb çi bû beylû nîyû Qismet û emrê Rebbî yû Deway şêxî Çilestûn û Bismil qezay şêxê min û Çemê Dîclî bin û bin û Roy welatê ma şîrin û Ma pêrsî leqebay pîyû Şêx Seʿîd, Mehmûd Feyzî yû Şêx Mehmûd û Şêx ʿElî yû Leqebay’ yini Septî yû Şêx ʿElîyo Pehlewî yû Mela Qasim de rî pîyû Mela Qasim Heyderî yû Heyder, Hacî Huseynî yû Huseyn hewna Huseynî yû Huseyn Seyyîd Haşîmî yû Ma toy ardî ver bi pîyû Leqebay’ key Şêx Elî yû Ez kalikê verî bono Seyyîd Haşîm o, ez vono Çilestûn di nome dono Muderîs û xonedon o Seferê Beẍdadî key û? Ma persî zemonê yeyû Tarîx hinzar û şeş sey û Hîris û new bîyar sey û Padîşah Sultan Murad û Sefer kerdû şîyw’ Beẍdad û Cêrû omew’ Sûk ew’ radû Veynû keyfê Sûki8 ca dû! Sûk ew dormey’ Sûki pîrû Şêx û ʿalim, ha çi mîr û Şî tewaf paşa w’ wezîrû Pawey’ Seyyîd Haşîm bîrû Sultan Sûki di vinertû Seyyîd Haşim nome hetû Paşa hêrs bi fermon vetû Walî w’ hukmet ardî xetû Walî ra va “emrê min û ʿEsker bikê Çilestunû Seyyîd Haşîm û heminû Ser û bin kê deway yinû” Baʿdî walî emir donû ʿEsker kenû gênû şonû Seyyîd Haşîm dewiconû Pîrû kîştî va “fermon û” Adir eyştû dew veşayû Seyyîd û şêxî qedyayû Çend hebî gedey û mayû Remay mon ra feletyayû Esl û neslay Şêx ʿElî yû Ay gedon ra baʿdî bîyû Emr û fermonê Rebbî yû Baʿdî bî şarê Palî yû Emrê Ella yû fermonû Şêx Çilestun dew ra şonû Key Şêxî şonî zozonû Key xwu benî Palî monû Key Şêxî şî Palî monû ʿİlm û şêxey bî beyonû Îrşad ke ehlê koyonû Qolhîsar û Erzeromû Qezay Palî cawo berz û Key Şêx ʿElî keyew ẍerz û De wa şaẍ û gilon berzû Kafir û zalim bilerzû Key Şêx ʿElî xonedon î ʿAlim û şêxê zemon î Warisê peyẍemberon î Serwerê pîrû şêxon î Murad, Palî ver o şonû Key Şêx ʿElî, key şêxon û ʿAlem heme pîrû zonû Hasud ʿînad û nezon û Welat û dîn ma dest şîyû War vecay Key Şêx ʿElî yû Vengon kewtû ecnebîyû Nezon ehmaq û delû yû Dewrê Palî koy ẍidar î Key Şêx ʿElî nomedar î Ma nêbî teres û barî Ko hukmê şerʿetî bîyarî Qubay Palî cawo berz û Çemê Muradî bilerzû Wa binalû pêlon berzû Ma rez ronaw’ hema ẍerz û 2. Herbê Orisî delîl û Îslom ra şe herbo pîl û Vecyay orte qal û qîlû Xaîn û pîs bî wekîlû Şima tarîx bewnî bes û Kûm herbê cîhanî persû Hinzar û newsey çares û Îslom ki bê veng û hes û De ti bewnî dewrê wextî Gure kewt destê bêbextî ʿEzil kerdî paşay textî Tadaw’ hukmo zor û zextî Tarîx şi newsey û newês û Ma nê zonaw’ nê ki hîs û Vetî anayasa pîsû Bê hukmet û bê reîs û Newsey û vîst û hîri di Zalimon va paştî pêdi Meclîs û cumretî cêdi Ardî meydon wirdi têdi Ardî pêser xelqî tasa Qanûnê cumretî asa Kerdî şaẍê anayasa Dîn çinîw’ dişmeno xas a Tarîx hinzar û newsey û Vîst û ponc ma ard seyû Îslom pîrû hayî peyû Red ke emrê îslomeyû Va “ma şerʿet hewa nonî Ca yey di ma qanûn onî Xelîfe w’ sultanî şonî Cumret anî, ma başqon î” Inê qalî pîs û dal î Pey hesayû ehlê halî Şêx Seʿîd pîrû hevalî Omey pêser kerdî qalî Şima bewnî qewmê herî Şerʿet û dînê ma berî Ma nişnî seyr bikî de rî Ma warisê pêẍember î Şerʿet û dîn rî ma war î Ma karwonê inê rarî Emrê qanûnê zerarî Goş medê kendîl û darî Va inê duşmenê dîn î Ferzo ma raşte vecînî Ma kîştay’ şerʿetî gênî Şehîd û ẍazî emîn î Ha çi dîn û ha welat û Tifaqa ki têdir vatû Va Muhemmed selawatû Kerdû cîhad û xebatû 3. Hasilî şêx û hevalî Ehlê heq û ehlê hal î Ageh û ponk û delal î Amûzê dînê celal î Fetwa geyraya hucronû Pîrû welatê kurdonû Gelê ʿalim û şêxonû Fîtne kewtû dînî monû Şêx Seʿîd, pîrû hevalî Deʿway heqqî kenî qalî Şima kerr û şima lal î Deʿway’ dîn a, ma heval î Sewtê şêxê ma veng donû ʿAlem eşnawenû, zonû Deʿway yey dîn û îmon û Sebay ma hemino vonû Fîtne vecyaw’ inê monî Dişmenê dîn û îmonî Decalê axir zemonî De hîşar bê, ma se vonî! Îslom sebay dînî estû Beyʿet û emrê elestû Qalû bela, neʿem estû Heşr û hesab, Ellay destû Çiqa şey dewr û zemonî Heta Îslom weş û gonî Veray kafirî w’ zebonî Deʿway yey deʿway îmonî 4. Hey wax û wax çi zemon û Şêx Seʿîd vendonû vonû Çiqa ʿalim û îslom û Wardê deʿwa bîya gironû Meclîs û hukmetê romî Cumret û qanûn ko ronî Zulmê kufrî ma se nonî Hukmê dînî veradonî Qewm û şarê cor û cêrî Xwu mekê teres û cêrî Bixebetî hezey şêrî Heyfê dînê xwu bigêrî Koy Nêribî berz û rêz î Deydiban û Pîr ʿEzîzî Cay Nêribî rast û duzî Deyşt ew qorî, dar û rezî Xeber geyray eşîrono Şîy Sîwon û Qerbegono Hafiz Efendîw’ Mistono Botî w’ Kavar û ‘Ulyono Çi Zîlon û Reşkotono Nêrib, Qelbîn û Têrkono Çewlîk, Dareynî yû Wano Dîyarbekir û Batmano Sêrt ew Bedlîs, Erzirom o Mi nêdîw’ ez ti ra xom o Çiqa ehlê xeym û komo Ez nezon o, mekê lomo Pali, Xarpêt û Kebon o Meʿden, Erxenî, Pîron o Gêl û Hêni cay begon o Lice w’ Hezro, Sîlwon o Şêx Rehîm vecyaw dewono Şono Nêribê Axono Nêrib eşîra giron o Esker yeno Hemekono Hema zaf o cay şêrono Qusur mewnê ez nêzono Şerê Kurdon û Romon o Ellah bido meradono Tifaq ew şewrê şêxono Yew cemʿetê ʿalimono Aẍa w’ pîlê ʿeşîrono Beg û mîrê ay zeronû Kûm hevalê şêxî bîyû ʿAlim û şêx û welî yû ʿEbdulqadirê Nehrî yû Salih Begê may’ Hênî yû Axtepe qîlê sipên î Şêx Adem û, Şêxê Hênî Key Şêx Hesen î, verên î Recber û xadimê dîn î Topraẍê kirdon zozon û Şêx Feteh şîw’ Fatrekonû Kewtû tenha w’ sulikonû Çew qeder ra çî nêzonû Şêxê corî w’ şêxê Çonî Şêxê cêrî w’ Melekonî Qamişlok ew şo Batmonî Cîzre, Teraşi w’ Sasonî Koy Bedlîsî, Koy Sîpînî Şêx ʿElî w’ Şêx Şemsedînî Şêxê Kotek ûw birînî Dehkeray’ ma deʿway dînî Şêxê Qerejdaẍo verî Hem Şêxê Altûn Mexerî De goştarê qewmê verî Ehlê ẍeyretî w’ hunerî Roy Xijikî donû pêlî Şonû ver bi Dizay’ Gêlî Roco teng bû mîrê Gêlî Mîrew Sadiq warê êlî Dizay’ Gêlî pace w’ berî Dormey dizi pêẍember î Mîrew Sadiq serʿeskerî Şêxî mektub nuşto de rî Mîrey’ Lice w’ ha Pêçar û Valêr ew Dareynî dar û ʿEskerê Şêxî ẍidar û Çindi zaf bû, indi kar û Inê nomey seraserî Ehlê heq û serʿesker î Rehmet û cennet bû de rî Ma se kî, îşê qederî 5. Ti seyr biki dunya fanî Tarîx û deʿwey dumanî Bi ʿesrî w’ weqtê zemanî ʿÎbret bigîw’ şarî bewnî Roca roc şîw’ yewbno ser di Ti mevaci deʿwa merdi Eyrû pey ra ca meverdi Lacon û tornon rî verdi Doz û deʿwey kalikon û Welat û şerʿa giron û ʿEyb û ʿar û, ca di monû Ellah heme çî ra zonû Ehlê namûs û xebatû Goş medên vati vatû Karê ma dîn û welat û Goştarê Ellay se vatû Nezoney ma kerdî leng î Zulmê şarî qalê veng î Xortê ma şêr û pileng î Pîrû pawey rocê tengî Ellay ma day naşt û daştû Cerab ew tercûbe waştû Pîrû xelq kerdû viraştû Hela kûm qe çewt û raşt û Hewar dunya roşn û tarî Deşt û koy û pîrû darî Behr û çem, eyn û virarî Welat û dîn destê şarî Hewar dunya to ma werdî To ma pîrû puçî kerdî Ma bî warê qehr û derdî Dest û lingê ma bî serdî Tûl û emel ma girewtî Ma bî ʿebdal dima kewtî Bî extiyar û qor çewtî Wextê mergî w’ cili kewtî Dunya fanî çiqa esta Vacê pîrû yewî desta Qeyd û kelebçey di besta Înon meki dewrî desta Însonê ma wa bizono Deʿwa derg a, ez nezon o Pîrû îslom bîw’ xizono Doz û deʿway xwu nêzono ʿEyb û, deʿwa mekê serdû Îslomey bîya kul û derdû Şarî talonê ma berdû Newbeçî w’ ha berî verdû De îslomey rî war vecî Gon û leşay to bidecî Hirs û teʿma xwu ra vecî Kafiron rî qehr û decî Înson esparê kelekî Omey ina dunya se kî Cîhadê îslomî vekî Deʿwa nêbena bi fekî Dunya wû merg û memat û Her çî benû pey xebatû Axê ma pîrû felat û Ha çi dîn û, ha çi welat û Înson cahil û nezon û Îş û karê xwu nêzonû Ellay çi ez daw’ nêvonû Dunya fanî ko ca monû Xaliqê ʿalemî vatû Heqê îslomî xebat û Sebay’ axretî w’ memat û Qay îslomey û felat û Ma îslomî wardî bewnî Goş medê ẍeflet û hewnî Duşmenê pîsî bilewm î Îslom kerdû xîntê hewnî Dunya hesas û zûra ya Neqeb û hesar û lay a Şeytonon domi ronaya Xwu bipawi tehluka ya Ina dunya se yew dom a Nimita ya, hîle w’ xom a Behro bêbin û bêqom a Kûm dekû bar û ʿîdom a Neqebê dunya ẍidar î Pîrû çewt î, xaç î, rar î Acêr û qayme w’ zinar î Duşmenê ma wehş û har î Emr û rarê ma Qur’an û Îslom gênû pira şonû Dunya fanî ko ca monû înson ehmeq û nezon û Warê şerefî w’ weqarî Xaliqê Wahîdê Barî Vatû, îslom pîl û, ma rî Qebul mekê emrê şarî Înson gurobê ʿîbret û Tim geyrenû menfeʿetû Hirs û teʿma wû minet û Belengazey û zîlet û Însono ehlê xebatî Xwu girewtû vati vatî Nêbi duşmîşê felatî Nêva ez pîs, timû vatî Ey însono ehlê keyfî Mebi kemʿaqil û seyfî ʿAqil bigî ti zav heyf î Goş medi şehwet û keyfî Ey îslom ehlê minetî Ha çi kitab, ha çi sunnetî Ellay day ma emonetî Heta bîw’ rocê axretî Heyf û ponk û, ino dînû Keso ki Ellay emîn û Wa cîhad kû, heta şînû Wa nêvacû ruh şîrîn û Şafiʿê ma pêẍember û Şerʿet ma rî ke rehberû Kafiro ke derbederû a çi rî rî şey mehşerû Umîdê ma şefaʿet û Pêẍemberê ma umet û Şerʿet ma rî emonet û Çi rî rî ma şeyrî hetû Qasid pêẍemberê ma wû Şerʿet û dîn şedênawû Ke temom ma rî verdawû Çew de rî war nêvecîyawû 6. Şêx Seʿîd ehlê şerʿetî Qarşî kufr û delaletî Cahidê dîn û sunetî Va “Dişmenî bê minet î” Va “dîn kewtû destê şarî Ma war vecî ʿeyb û, ma rî Mebê tenbel û bêkarî Ma mes’ul û gunekar î” Ellay ma day seba dînî Ma gerek dîn bişedênî Nêkî hakim hukmê dînî Wellay ma nêxelesînî Welatê kirdon zozon û Cay şêxon û ʿalimon û Duşme omew’ kewtû monû Dîn û mal kerdî talonû Şew ha şîya bîyû rocû Hewn ra wardê ma rê sûc û Ha çi zaza wû kurmonc û Bixebetî şew ew rocû ʿErd û asmên qat bi qat î Ma înson û mexluqat î Tat û lat û, ha çi zat î Pîrû qay dîn û xebatî Beʿdê dunya w’ her çî pîrû Ebedî w’ axret ko bîrû Hesab û zeber û zîr û Hezey dunya nîw’ ki vîrû Şêx Seʿîd, pîrû hevalî ʿAlim û şêxê delalî Deʿway yini şerʿet bîyarî Batil î fikrê Kemalî Şêx û enbazî xwu, zat î Vêrtî şîy ma pîrû vatî Kerdû cîhad û xebatî Şoreşê dîn û welatî Cîhad kerdû sebay dînî Şêx Seʿîdî daw’ verinî ʿElî Riza w’ Şêx Mehdînî Şêx Tahir, Şêx Selhedînî ʿElî Riza, şêxê ʿîlmî Zav ʿalim û warê hîlmî Duşmenê zalimî w’ zulmî Dest û lingê ma bî kilmî Topraẍê kirdon bi dar û Çi Xunus û Qolhîsar û Palû, Xarpêt hey hewar û Serd ew Pîron ko xidar û Ferzê îslomey cîhad û Veray kufrî vindû wardû Kendîlê ma çiqa dar dû Talon û hicret û, bar dû Meydonê dunya dewron û Dewrê ma axir zemon û Şêx Seʿîd dîn ma ra vonû Rehberê şerʿa giron û Qezay Xarpêtî Meʿden û Dîyarbekir dor beden û Berê Koy qayme abenû Zalim ha fermo onenû Gelê îslomî fermon û Fermonê şêxo gironû Veşû key zalimonû Vonî qanûn û ʿîdom û, Ellah qehr kû zalimonû Vetû fermonê şêxonû Kerdî qeyd û kelepçonû Îslomey bî perîşonû Îstîqlal nomew’ xom û Hukmet ko qay ma rî ronû Ino qanûnê romon û Îslomey sûc û ʿîdom û Bedenê Sûki çer berî Heme çer asinî verî Duşmenî zalimê her î Şêxê ma kerdî pey berî Bedenê Sûki heraw û ʿUrfî îdare ronawû Ceza reîsî risya yû Peybi qanûn hukum dawû Binê ʿedlî fîsqaya wû Şêxî berdî mehkemawû Dîwanê ʿurfî ronawû Fermonê îslomî dawû Sûki paytextê kurdon û Berê koy ver bi koyon û Zalim tede yenû şonû Daraẍacî tede ronû Zalimon nuştû fermonû Fermonê şêxon û begon û Toy sirgum û, toy ʿîdom û Toy bî mehkumê koyonû ʿÎdom irsê sehabon û Hîcretê pêxemberon û Herb û cîhad û talon û Kar û halê îslomon û Îş û karê dunya war di Kendîlê ʿîdomî dar di Şêx û hevalî ha kar di Zulm û zalimî xesar di Warê îmonê temomî Nêtersenî, şima xom î Ẍaye îmon û îslom î Çi kendîl û çi ʿîdom î Mergê şehîdow rehet û Mergê yini se sihet û Deʿwa heqq û ʿedalet û Ma heta şeyrî axretû Rebbê ʿalemî xaliq û Dînê ma îslom û heq û Zalim û kafir niheq û Kendîlê ma eyştû leqû Hey hewar û hey hewar û Wellay ma rî ʿeyb û ar û Kendîlê şêxon bi dar û Ïslomey bîya ustûxarû Ma ko bimrî, ma ha şonî Deʿwey dînî ko ca monî Ha çi şerʿet û Qur’anî Veʿdê mergî ma se vonî Salih Beg û şêxî pîrû Vonî ʿîdom ko bîw’ vîrû Zalim wa rind bikû sîrû Rocê heşrî kûm wezîr û Emrê mehkema w’ reîsî Kendîl û di darê pîsî Nîw’ heps û çer hebî dîs î Ellah warê cinî w’ însî Dare w’ kendîl bêminet î ẍaye heq û edalet î Deʿway’ ma rocê axretî Ewraqî ha Ellay hetî Cahîl, ehmaq û nezon û Dar ew kendîl anû ronû Vonû qay ko mi rî monû Rocê heşrî yo se vonû Sebay di daron û leqî Bê qîmetî w’ bîlaheq î Ters û perway ma bi heqî Qay Ellay rî w’ muheqeqî Zalimo pîs wa bizonû Ci ʿîdom û çi fermon û Ma rî kay gurî gedon û Rezay Ellay ma rî monû Gon û ruh destê Ella yû Dunya îmtîhonê ma yû Zalimo pîs xapeyayû Vonû qay pîlê dunya yû Çîy nêbenû, mehşer estû Yi ko yaxe bidî destû Duşmeney qerez û qesd û Her çî yew rocê yey estû Cenet weş û, weş mekon û Cay rindon û şehîdon û Şêx Seʿîd îfade donû Gunek halê zalimon û Zalimon zav zulm kerdû Şêx Seʿîd orte ra berdû La qey îslom pîrû merdû? Ax û ûf û kul û derd û Îslom nezon û bîlac û Wa xocay ra persû vacû Qey îslomey yew nimac û Zekat û roce wû hac û? Ma îslomê halê wextî Pîrû yewnon di bêbext î Roc ew nimaco ponc wextî Vonî qaybê warê textî 7. Zimiston û, vewra serdû Îslomon di fikir merdû Ma dînê xwu bêwar kerdû Zor a Ellah ma rî verdû Zonaye w’ ʿalimî estî Dmr û fermon zulmî destî Hergûyew yew çî ra bestî Doz û deʿwey ma bî sistî Îş û karê dînî zaf î Hezey varon û xûnav î Mebê tenbel û bêbavî Wa îslomî bibî zavî Dunya înson kerdû şaşû Hirs û teʿma wû meʿaş û Binê yey asî yû kaş û Bîw’ ẍafil û vonû “baş û” Vêrtû şîyw’ weqt û zemonû Doz û deʿwey ra nezon û Zav ʿeşîr û xanedon û Xwu kerdû lal û bêzonû Ey ʿalim û şêxê wextî Kûy’ xelîfe w’ paşay textî Dîn kewtû destê bêbextî Kûy xebatay şima w’ wextî ʿAlim û şêxê tenbelî Dînê ma şîyw’, ma bî delî Pey fekî ma pîrû welî Sûc mekê sûcê ezelî Goya ma ʿeskerê dînî Ma omey dîn bişedînî Ma dîn eyştû va zengînî Ma dest ta şîyw’ hukmê dînî Heyatê dunya hesas û Kitab û sunet esas û Ha çi îcmaʿ û qiyas û Dima şo wa to rî basû Hîley’ dunyayî qiyas û Çîyw’ ki tede to rî basû ʿEmelo saliho xas û Qelbo safî yû îxlas û Key Şêx ʿElî key merad î Şêx û ʿalim tede wardî Selhedîn şêxê îrşadî Îl û qewm ma pîrû kardî Şêx Selhedîn wextê ma di Şêxo kamil ha dinya di Îrşad kenû heme ca di Mehmed Seʿîd ha hucra di Şêx Selhedîn tewbe donû Xunus hetta Erzeromû Sîwon û Qerebegon û Sûk ew Xarpêt, Palî monû Şêx Selhedîn vecyaw’ monî Şêxê îrşad û zemonî Mebê tenbel û nezonî De hîşyar bê ma bizonî Şêxî vatû ma înson î Dehkeray’ ma pîrû zonî Emr û fermonê îslomî Veray kufrî bibî gonî Bextê mergî w’ dunya yew î Muhleton nêdonî çewî Gûm ew vîsti de rî qewî Nêvonî heyf û bedew î Şêxê ma wo Şêx Selhedî Wetenê şêxî serhed î Pali, qube yû merqedî Şêx şîyw’ meskeno ebedî Şêx Selhedîno rehberî Ma duʿa wazenî de rî Ya Reb ti şêxê ma berî Cennet û hewzay’ kewserî Wefat kerdû Şêx Efendî Murîdî bêwarî mendî Welat û ʿeşîr û bendî Vacê “heyy” û Ellay vendî Şêx Selhedîn şîyw’ rehmetû Mehmed Seʿîd ha ma hetû Donû tewbe w’ terîqetû Ruh û qelbê ma rehet û Mehmed Seʿîd şêxê ma yû Cebagay ma hewa nayû Ma murîd î, tewbe dayû Heme çî destê Ella yû Mehmed Seʿîd şêxo ponk û ʿÎlm û îrşad ko ma mon kû Kul û derd duşmenî gon kû ay yini weyron û xon kû Kird û zazay’ cor û cêrî Roco teng qey nînû vîrî ʿAlim û şêx û ʿeşîrî Luy omey’ meskenê şêrî Mehmed Seʿîd şêx û, zonû Rebbî şên kû wecaẍonû Îrşad bikû bîyw’ ma monû Ellah bidû meradonû Cay Sîwonî nimz û qîl î Lay ew eynî, çemî w’ gîl î Key Şêx ʿElî keye w’ pîl î Îrşad û welat û îl î Roy Akragi pêlî donû Corê yey Qîlê Qencon û Koyo berz û Melekonû Şêx bîyw’ ma rî helqa ronû Koy Nêribî, Koy Pîr ʿEzî Qerbegon caw’ nimz û berzî Cite w’ çem û ʿerd10 û rez î Zikr û cezbe ‘w ma bilerzî Qerbegon û, cay mîron û Beg û ʿeşîra giron û Dewê yey nizdî yebnon û Şêx ha tede yenû şonû Sîwon, Qerbegon hera wû Yew nîʿmet û, Ellay dawû Şêx Selhedînî dima wû Mehmed Seʿîd şêxê ma wû Çi Sîwon û Qerbegon û Şarê yey wa weş bizonû Naz û nîʿmet Ellah donû Şêxî omey yini monû Ey şarê maw’ kirdê serî Halê ma wû inka w’ verî Dînê xwu ma bî bonderî Şêxê ma warê hunerî Hîmmetê şêxon xidar û Raro musteqîm û, rar û Kûm Ellay vendû, bibarû Rehmay Ellay de rî varû Qubay Comî Palî ber î Ma duʿa biwazî verî Rehmay’ Ellay varû de rî Şefaetê Pêẍemberî 8. Kalikê Pêẍemberê ma Îbrahîm û, rehberê ma Zonê yey kird û verê ma Serdest î tim ʿalimê ma Ha tarîxê dunya estû Wa serbest kî bîyar destû Heta Rebbî va “elestû” Pîrû têdir tede estû Tarîxê ma zaf verînî Kirdî tim ‘aşiqê dîn î Ti ra ʿalimî vecînî Zalimon ma kerdî vînî Bewnî tarîxî se vatû urd verîn û, esl û zat û Cesur û ehlê xebat û Mileton ra tim dîn vatû Kultur ey Kurdon û, verî Îslomey rî ma rehber î Goş medêni qewmê herî Vonî kurdî bî lengerî Milet û qewmê zemonî Inka w’ verî heta şonî Pîrû têdir heme zonî Kurd ʿesîl û xonedon î Kirdî yewno rî jêhat î ‘Eyb û qusur vati vatî Şarî ser bîyw’ tat û latî Bê hunerî w’ bêxebat î Kirdê ma cahîlî mendî Bî hasûd û bî dubendî Şarî ra tim va efendî Cora ma tim tepa mendî Temmet biʿewnîllahî teʿala Mîn yedî’l-heqîrû’l-feqîr *Transkripsîyon: Bîlal Zîlan **Çavkanî: Kovara Şewçila, h: 17, rr: 54-73, 2022